WADJEEB TURI DRO
Oleh: Tisma
Tieup tieup geutanjoe wadjeeb turi droë
Supaja sampoe hudeep lam donja
Deungon ileumé tanjoe turi droë
Wadjeeb meurunoe tuha dan muda.
Djinoe na batjut ulon hareutoe
Asai geutanjoe ‘ajeeb lagoena
Bak ië njang hanji meudjeuet geutanjoe
Seuhingga sampoe djeuet manusia.
Baroo taturi meupat djinéh droë
Bék kheuen droë bakoë wahee sjeédara
Beuna taturi Tuhan njang sïdroë
Bék sagai tuwoe keu ureueng peuna.
Keu ureueng peudjeuet bek sagai tuwoe
Geupeudjeuet geutanjoe bak barang hina
Nibak teumpat brook sinan hai adoë
Bek pubakoe droe seusama gata.
Geutanjoe insan peuneudjeuet sahoe
Ingat hai adoë agam ngon dara
Meuna taingat asai geutanjoe
Sama keudroë droe meungdeungki hana.
Deungki mengdeungki bék nalee djinoë
Ateueh geutanjoe saboh agama
Tieup uroë sabee ingat bèk tuwoë
Keudjalan tawoë u nanggroë baqa.
Sumber: Lagu-Lagu dari Orkes Djeumpa Atjeh Djilid I Tjetakan II. Diterbitkan oleh H. Razali Djuned, Pegawai Kantor Urusan Agama Kotamadya Banda Atjeh. Ditjetak oleh Pertjetakan Negara, Banda Atjeh, 1967. Dikutip Line1.News dari laman Koleksi Digital Universiteit Leiden.
Komentar
Tanggapilah dengan bijak dan bertanggung jawab. Setiap tanggapan komentar di luar tanggung jawab redaksi. Privacy Policy